Azərbaycan Dövlət Neft və Sənaye Universitetinin (ADNSU) rektoru, dosent Rüfət Əzizov və rektorun elmi inkişaf məsələləri üzrə müşaviri Orxan Kərimzadə magistratura səviyyəsində həyata keçirilən beynəlxalq İkili Diplom Proqramı çərçivəsində Böyük Britaniyanın Vorvik Universitetində səfərdə olublar.
Səfər zamanı ADNSU nümayəndələri Vorvik universitetinin rəhbərliyi ilə görüşərək universitetin təhsil və tədqiqat imkanları barədə görüşdə iştirak ediblər. Görüş zamanı Vorvik Universitetində həyata keçirilən innovativ layihələr, sənaye ilə əməkdaşlıq nümunələri və beynəlxalq tərəfdaşlıqlar haqqında ətraflı məlumat verilib.
Daha sonra ADNSU rəhbərliyi Vorvik universitetinin nəzdində fəaliyyət göstərən qabaqcıl tədqiqat mərkəzlərini ziyarət edib. Nümayəndələr Polad istehsalı mərkəzi, Enerji innovasiya mərkəzi, Batereya sənayeləşdirmə mərkəzi və Lazer emalı tədqiqat mərkəzində aparılan işlərlə tanış olublar. Onlara sənayenin aktual çağırışlarına cavab verən yeni texnologiyalar və tətbiqi tədqiqat istiqamətləri barədə geniş məlumat verilib.
Rektor Rüfət Əzizov səfərin əhəmiyyətini vurğulayaraq bildirib ki, ADNSU ilə Vorvik Universiteti arasında əməkdaşlığın məqsədi yalnız təhsil sahəsi ilə məhdudlaşmır: “Əsas hədəfimiz bu tərəfdaşlığı tədqiqat istiqamətində də gücləndirmək, birgə layihələr həyata keçirmək və sənaye ilə universitetlər arasında daha sıx inteqrasiyanı təmin etməkdir.”
Qeyd edək ki, ADNSU ilə Vorvik Universiteti arasında “Bərpa olunan enerji mənbələri” ixtisası üzrə magistratura səviyyəsində beynəlxalq İkili Diplom Proqramı həyata keçirilir. Proqram tələbələrin həm nəzəri biliklərini, həm də praktiki təcrübələrini zənginləşdirərək enerji sektorunda qlobal trendlərə uyğun rəqabətqabiliyyətli mütəxəssis kimi yetişməsinə imkan yaradır.
