Türkiyənin Enerji və Təbii Sərvətlər Nazirliyi ilə Səudiyyə Ərəbistanının "Acwa" şirkəti arasında 2 GVt gücündə günəş elektrik stansiyalarının tikintisini əhatə edən saziş imzalanıb.
İstanbulda keçirilən imzalanma mərasimi fevralın 3-də Prezident Recep Tayyip Erdoğanın Ər-Riyada səfəri zamanı iki ölkə arasında imzalanmış 2 milyard dollarlıq hökumətlərarası enerji sazişindən sonra baş tutub.
Sənədə əsasən, mərkəzi Türkiyənin Sivas və Karaman vilayətlərində ümumi gücü 2 000 meqavat olan iki günəş elektrik stansiyası tikiləcək. Rəsmilərin bildirdiyinə görə, bu güc 2,1 milyon ev təsərrüfatının elektrik enerjisi tələbatını ödəməyə kifayətdir.
Mərasim çərçivəsində həmçinin Türkiyə Elektrik İstehsalı Korporasiyası (EÜAŞ) ilə "Acwa" arasında elektrik enerjisinin alqı-satqısı müqaviləsi imzalanıb.
Türkiyənin enerji və təbii sərvətlər naziri Alparslan Bayraktar layihəni enerji sektorunda indiyədək həyata keçirilmiş ən böyük yerli və xarici investisiyalardan biri kimi qiymətləndirib. Bayraktar bildirib ki, Türkiyə ölkə tarixində əldə olunan ən aşağı qiymətlə elektrik enerjisi tədarükünü də təmin edəcək.
Nazir əlavə edib ki, layihədə lokallaşdırma mühüm əhəmiyyət daşıyır və həm Sivasda, həm də Taşelidə lokallaşdırma səviyyəsi ən azı 50 faiz olacaq.
O, layihənin maliyyələşdirilməsində beynəlxalq maliyyə institutlarının maraq göstərdiyini qeyd edərək, Avropa Yenidənqurma və İnkişaf Bankını (EBRD) və Beynəlxalq Maliyyə Korporasiyasını misal çəkib.
Bayraktarın sözlərinə görə, layihələrin təməli bu il qoyulacaq. “2028-ci ilin əvvəlinə qədər hər iki elektrik stansiyası kommersiya fəaliyyətinə başlayacaq və mümkün qədər tez tam gücə çatacaq,” – deyə o bildirib.
Nazirin sözlərinə görə, ümumi gücü 5 000 meqavat olan razılaşmanın ikinci mərhələsi əlavə 3 000 meqavat günəş və külək elektrik stansiyası investisiyalarını əhatə edəcək.
“Biz günəş və külək enerjisi üzrə quraşdırılmış gücümüzü demək olar ki, sıfırdan bu gün 40 000 meqavatdan çox səviyyəyə çatdırmışıq. Daim vurğulayırıq ki, ölkəmizin bərpa olunan enerji sahəsində daha böyük potensialı var,” – deyə o, mərasimdə bildirib.
Qeyd edək ki, Türkiyə 2035-ci ilə qədər günəş və külək enerjisi üzrə quraşdırılmış gücü 120 000 meqavata çatdırmağı hədəfləyir.
