Azərbaycanın "Dənizdə külək enerjisi üzrə Yol Xəritəsi" təqdim olunub
Bakı Enerji Forumunun ikinci günündə Dünya Bankı və Beynəlxalq Maliyyə Korporasiyasının (IFC) dəstəyi ilə hazırlanmış Dənizdə külək enerjisi üzrə Yol Xəritəsi təqdim olunub.
Bu barədə "Berpaolunanenerji.az"a Energetika Nazirliyindən məlumat verilib.
Forumun müvafiq sessiyasında Azərbaycanda dənizdə külək enerjisinin inkişaf potensialının təhlili, atılmalı olan addımlar, beynəlxalq əməkdaşlıq, texniki, iqtisadi, ekoloji, sosial aspektlər, məşğulluq və maliyyələşdirmə məsələləri müzakirə olunub. Bildirilib ki, Yol Xəritəsi Azərbaycanda dekarbonizasiya və dayanıqlı inkişaf prioritetlərinə uyğun olaraq uzunmüddətli perspektivdə infrastrukturun inkişafı və investisiya cəlb edilməsilə 2040-cı ilə qədər dənizdə 7.2 QVt ümumi qoyuluş gücündə külək elektrik qurğularının quraşdırmaq potensialının olduğunu göstərir. Bununla belə, sənəddə aşağı artım ssenarisinə də baxılır ki, bu ssenari üzrə potensial 1.5 QVt həcmində qiymətləndirilir.
Sessiyada çıxış edən energetika nazirinin müavini Elnur Soltanov bildirib ki, ötən illər ərzində Azərbaycan Xəzər dənizindəki neft və qaz resurslarımızdan ölkəmizin iqtisadi inkişafı naminə effektiv şəkildə istifadə edib. İndi isə neft və qaza paralel olaraq yeni resursdan - dənizdə külək enerjisindən faydalanmaq üçün fürsətlər yaranmaqdadır. "Dənizdə külək enerjisi Azərbaycanın gələcək inkişafı naminə dekarbonizasiya və iqtisadiyyatın şaxələndirilməsi ilə bağlı məqsədlərimizə nail olmaqda əhəmiyyətli potensiala malikdir və neft-qaz sahəsindəki təcrübəmiz bu yeni sektoru inkişaf etdirmək üçün unikal imkanlar yaradır" deyə o əlavə edib.
Qeyd edək ki, adıçəkilən Yol Xəritəsi Dünya Bankı Qrupunun “Enerji Sektorunun İdarəedilməsində Yardım Proqramı” - ESMAP çərçivəsində və Energetika Nazirliyi ilə Beynəlxalq Maliyyə Korporasiyası arasında dənizdə külək enerjisindən istifadə sahəsində əməkdaşlığa dair imzalanmış Anlaşma Memorandumuna əsasən beynəlxalq məsləhətçilərin iştirakı ilə hazırlanmışdır.
Rəylər (0):