"ALREN Azerbaijan" (Alternative and Renewable Energy Azerbaijan) layihəsi 5 iyun 2018-ci ildə, “Ümumdünya Ətraf Mühit Günü”ndə sosial təşəbbüs kimi fəaliyyətə başlayıb. Layihə Azərbaycanda alternativ və bərpa olunan enerji sahəsi üzrə yerli kontekstdə məlumat azlığının aradan qaldırılmasına və bu sahənin inkişafına dəstək olmaq məqsədilə yaradılıb.
Onlayn platforma tərəfindən sosial media kanalları vasitəsilə 8 minə yaxın izləyiciyə müxtəlif maarifləndirici məlumat, informasiya, yerli və dünya xəbərləri, o cümlədən videoçarxlar hazırlanaraq Azərbaycan dilində təqdim edilib. Layihənin həyata keçirildiyi 2018-2021-ci illərdə hazırlanan məlumat sayı 800-ə yaxın olub.
Platforma "Azərbaycan Elm Assosiasiyası" tərəfindən 13-14 aprel 2019-cu ildə təşkil edilən "Multidissiplinar Elmi Forum"un və 16 noyabr 2019-cu ildə koreyalı mütəxəssis Dong Won Parkın təqdimatı ilə keçirilən “Fukuşima fəlakətindən sonra nüvə və bərpaolunan enerji mənbələrinin bu günü və gələcəyi” seminarının tərəfdaşı olub.
Platforma tərəfindən 24 aprel 2020-ci ildə bərpaolunan enerji üzrə mühəndis-energetik Cahid Mikayılov tərəfindən "Günəş fotovoltaik (PV) texnologiyası" adlı vebinar keçirilib.
Bundan əlavə, platforma tərəfindən yayımlanan məlumatlar “Azərbaycan işıqları” analitik informasiya jurnalında mənbə göstərilməklə dərc edilib (iyul 2019, №6; səh. 32). “ALREN Azerbaijan” 2018-ci ildə "Millinet-Milli İnternet Mükafatı"nın iştirakçısı olub.
2020-ci il 2 sentyabr tarixində platforma fəaliyyətini qismən dayandırıb (tam olaraq 2021-ci ilin mart ayı) və təşəbbüsün davamı olaraq "Azərbaycan Bərpaolunan Enerji Assosiasiyası" (AZREN) təsis olunub. Birliyin Nizamnamə üzrə məqsədi Azərbaycanda bərpa olunan enerji sahəsinin inkişafına dəstək olaraq töhfə verməkdir.
"Yaşıl Enerji" qrupu sosial media platforması kimi 2019-cu il 19 aprel tarixində yaradılıb. Qrup bu istiqamətdə çalışan mütəxəssislər, təhsil alan tələbələr və maraqlanan hər kəsi bir araya toplamaq, informasiyaları paylaşmaq və mübadilə etmək məqsədilə yaradılıb. Qrup üzvləri yalnız bərpa olunan enerji mənbələri, yaşıl iqtisadiyyat, ətraf mühitin qorunması və digər bu kimi mövzularda istənilən paylaşımlar (xəbər, foto, video, maarifləndirici, məqalə, elan və s.) edə bilər. Hazırda qrupun 1,8 mindən çox üzvü var.
Renewables.az bərpa olunan enerji sahəsi üzrə ilk ixtisaslaşmış informasiya portalıdır. Azərbaycanda və dünyada baş verən ən son xəbərlər, rəsmi hesabatlar, müsahibələr və araşdırma məqalələri oxuculara təqdim edilir. "Berpaolunanenerji.az" adı ilə fəaliyyətə başlayan portal 2 aprel 2021-ci ildə ilk xəbərini dərc edib. Sayt 2022-ci ilin dekabrından "Renewables.az" adı ilə fəaliyyətini davam etdirir.
Xəbərlər birbaşa rəsmi mənbələrə, xarici və yerli informasiya agentliklərinə istinad edilərək yayımlanır. Saytda həmçinin yerli və beynəlxalq təşkilatların hesabatları, statistikalar, müsahibələr, məqalələr və elanlar dərc olunur. Mənbələr kateqoriyasında isə bərpa olunan enerji mənbələri üzrə xəbər və məlumatlar yayımlanır.
Portal sektor üzrə keçirilən tədbirlərə hər zaman dəstək göstərir və əməkdaşlıq edir. Bakı Enerji Həftəsi çərçivəsində Türkiyənin aparıcı enerji şirkəti "Genba Group"la əməkdaşlığa dair razılaşma əldə olunub.
Tərəfdaşı olduğumuz yerli və beynəlxalq tədbirlər:
- TEKNOFEST Azərbaycan (2022/media tərəfdaşı)
- Green Energy Revolution (2022/sponsor)
- V Qrant Müsabiqəsi-"Enerjini özün YARAT" (2022/tərəfdaş)
- Bakı Su İnnovasiya Forumu (2022/media tərəfdaşı)
- 10-cu Yubiley Xəzər Beynəlxalq "Energetika və Bərpa Olunan Enerji" Sərgisi (2022/informasiya dəstəyi)
- 27-ci Bakı Enerji Forumu (2022/informasiya dəstəyi)
- 15-ci Beynəlxalq "SOLAREX İstanbul" Günəş Enerjisi və Texnologiyaları Sərgisi (2023/media partnyoru)
- Konya Enerji Zirvəsi və Sərgisi (2023/media sponsoru)
- 11-cu Xəzər Beynəlxalq "Energetika və Yaşıl Enerji" Sərgisi (2023/internet dəstəyi)
- 28-ci Bakı Enerji Forumu (2023/internet dəstəyi)
- 3-cü Azərbaycan Beynəlxalq "Qarabağın Bərpa, Yenidənqurma və İnkişafı" Sərgisi (2023/internet dəstəyi)
- Young Climate Champions-"Creat your own energy" (2023/tərəfdaş)
Uğurlarımız:
- NETTY Milli İnternet Mükafatı (2022/finalçı nominant)
"Renewables.az" 28-ci Bakı Enerji Forumunda deleqat qismində iştirak edib.
Qısa zaman ərzində öz oxucu kütləsi formalaşan saytın aylıq unikal istifadəçi auditoriyası 2 min nəfər, sosial şəbəkələrdəki istifadəçilərinin sayı isə 850 nəfərdən çoxdur. Saytda bu günədək 2 200-dən çox xəbər dərc olunub.