Bakı Limanı ərazisində tam olaraq külək və günəş enerjisindən istifadə ediləcək

Bakı Limanında (Port of Baku) ekologiyanı daha yaxşı qorumaq üçün yeni strategiya hazırlanıb. Bu barədə "Berpaolunanenerji.az" “Bakı Beynəlxalq Dəniz Ticarət Limanı” QSC-yə istinadən xəbər verir. Məlumata görə, bu strategiyaya əsasən 2035-ci ilə qədər Bakı Limanında istixana qazı emissiyası sıfıra endiriləcək. Bunun üçün də bir sıra yeniliklərin tətbiqi planlaşdırılır:

• liman ərazisində yalnız yaşıl yanacaqla işləyən nəqliyyat vasitələrindən (elektromobillərdən və s.) və avadanlıqlardan istifadə ediləcək;
• liman akvatoriyasına daxil olan gəmilər tam olaraq elektrik enerjisi ilə təmin ediləcək;
• liman akvatoriyasında yalnız elektriklə və ya yaşıl yanacaqla işləyən yedək gəmilərilərindən istifadə ediləcək;
• liman ərazisi və akvatoriyasında tam olaraq yalnız yaşıl, o cümlədən günəş və külək enerjisindən istifadə ediləcək;
• bütün ofis binaları və tikililər yaşıl bina standartlarına uyğunlaşdırılacaq.

Qeyd edək ki, Bakı Limanı regionda “Yaşıl Liman” statusuna layiq görülən ilk limandır.