"Masdar" və "Uzbekhydroenergo" nasoslu hidroelektrik layihələrinin tikintisi ilə bağlı müqavilə imzalayıb
BƏƏ-nin təmiz enerji mərkəzi Abu Dhabi Future Energy Company – "Masdar", Özbəkistanın dövlətə məxsus su elektrik enerjisi istehsalçısı “Uzbekhydroenergo” ilə ölkədə bir neçə saxlanc sistemi olan nasoslu hidroelektrik layihəsinin həyata keçirilməsinin mümkünlüyünü qiymətləndirmək üçün müqavilə imzalayıb.
Renewables.az xəbər verir ki, bu barədə "Masdar" məlumat yayıb. Bildirilir ki, bu şirkətin mövcud sahədə ilk belə layihəsidir.
2023-cü ilin dekabr ayında Özbəkistanda "Masdar" tərəfindən hazırlanmış 1,4 QVt ümumi gücü olan günəş və külək layihələri şəbəkəyə qoşulub. Şəbəkəyə qoşulmuş layihələrə 500 MVt gücündə Zərəfşan Külək Elektrik Stansiyası və Cizzax, Səmərqənd və Şərabadda yerləşən və regionda ən böyük günəş enerjisinin inkişafı proqramını təmsil edən üç günəş enerjisi layihəsi daxildir. Şirkət, həmçinin əlavə 2 QVt külək layihəsinin hazırlanması və ölkədə mövcud olan beş layihədə 1150 meqavat-saat tutumlu enerji saxlanc sistemlərinin yerləşdirilməsi haqqında saziş imzalayıb.
Hidroenergetika texnologiyası Özbəkistanın enerji kompleksinin mühüm hissəsidir. Ölkə 2028-ci ilə qədər 6 QVt su elektrik enerjisi gücünə nail olmağı hədəfləyir. Cari güc 2 QVt-dan bir qədər çoxdur. Özbəkistan 2030-cu ilin sonuna kimi 7 QVt günəş və 5 QVt külək enerjisi istehsal etməyi hədəfləyir.
Qeyd edək ki, "Masdar" Azərbaycanın etibarlı enerji tərəfdaşıdır. Şirkət tərəfindən ötən ilin oktyabrında regionun ən böyük günəş elektrik stansiyası (GES) olan "Qaradağ" GES istifadəyə verilib. Şirkət 2030-cu ilə qədər bərpa olunan enerji portfelinin 100 QVt tutumunu hədəfləyir və BƏƏ Konsensusunda bu onilliyin sonuna qədər qlobal bərpa olunan enerji potensialını üç dəfə artırmaq məqsədini dəstəkləyir.
Rəylər (0):