COP29 tədbirində energetika nazirinin iştirakı ilə mətbuat konfransı keçirilib
COP29 tədbirində energetika naziri Pərviz Şahbazovun iştirakı ilə mətbuat konfransı keçirilib.
Renewables.az Pərviz Şahbazovun çıxışını təqdim edir:
Hörmətli həmkarlar,
Əziz qonaqlar,
Dəyərli mətbuat nümayəndələri!
Azərbaycanın ev sahibliyi etdiyi COP29 çərçivəsində keçirilən Enerji Günündə hamınızı səmimi qəlbdən salamlayıram. Bu beynəlxalq mətbuat konfransı vasitəsilə COP29-un enerji təşəbbüsləri, Azərbaycanın həyata keçirdiyi yaşıl enerji layihələri və bu təşəbbüslərin qlobal enerji keçidindəki əhəmiyyəti barədə fikirlərimizi sizinlə bölüşməkdən böyük məmnunluq duyuruq.
Bu gün COP platformasında 5 komponentdən ibarət olan 3 əsas enerji təşəbbüsünü elan etdik. Birinci təşəbbüs, tamamilə Azərbaycan təcrübəsinə əsaslanan və yaşıl enerji dəhlizlərinin, həmçinin yaşıl enerji zonalarının yaradılmasını təşviq edən “Yaşıl Enerji Vədi”dir. İkinci təşəbbüs isə “Enerji Saxlama və Şəbəkələr Öhdəliyi”dir ki, bu da 2030-cu ilə qədər qlobal enerji saxlama gücünü altı dəfə artıraraq 1500 GW-a çatdırmağı və 2040-cı ilə qədər 90 milyon km şəbəkə əlavə etməyi hədəfləyir. Üçüncü təşəbbüsümüz “COP29 Hidrogen Bəyannaməsi”dir.
Bu təşəbbüslər Azərbaycanı bərpa olunan enerjinin inkişafı və ixracında lider mövqeyə yüksəltməklə yanaşı, genişmiqyaslı ötürmə, uzaq potensial enerji mənbələrinin istehlak mərkəzləri ilə əlaqələndirilməsi, enerji təchizatı ilə tələbat arasında tarazlığın təmin edilməsi və böyük həcmdə yaşıl enerji güclərinin şəbəkəyə inteqrasiyası ilə qlobal miqyasda təmiz enerjinin inkişafını sürətləndirmək üçün unikal imkanlar yaradır. COP29 bütün ölkələri bu öhdəliklərə qoşulmağa, enerji keçidimizi və iqlim fəaliyyətimizi gücləndirmək və dünyamız üçün dayanıqlı bir gələcək qurmaq naminə birliyə çağırır.
COP29 Azərbaycanın yaşıl enerji keçidinə sadiqliyini əks etdirən əlamətdar uğurlarla müşayiət olundu. Yaşıl enerji zonası - Şərqi Zəngəzurda bp şirkəti ilə ilk sənaye miqyaslı günəş enerjisi və ən böyük birbaşa xarici investisiya layihəsi olan 240 MVt gücündə stansiyanın təməlini qoyduq. "Xəzər-Avropa yaşıl enerji dəhlizi" üzrə nazirlərin 9-cu iclasını keçirdik və layihənin texniki-iqtisadi əsaslandırmasının ilkin nəticələri ilə tanış olduq. Eyni zamanda, Azərbaycan, Qazaxıstan və Özbəkistan arasında yaşıl enerjinin inkişafı və ötürülməsi sahəsində strateji tərəfdaşlıq haqqında Hökumətlərarası Saziş imzalandı, Səudiyyə Ərəbistanının bu üçtərəfli layihəyə mühüm tərəfdaş kimi qoşulmasını təmin edən sənədlər qəbul olundu. Bundan əlavə, Çinin 6 şirkəti ilə 6 müqavilə imzalandı, Azərbaycan öz hidrogen strategiyasını elan etdi və Beynəlxalq Atom Enerjisi Agentliyi ilə Paris Sazişi kontekstində enerji planlaşdırılması sahəsində əməkdaşlıq haqqında Anlaşma Memorandumu imzaladıq. Bu gün İƏT Təmiz Enerji Mərkəzinin açılışını edəcəyik. Sabah isə 760 MVt gücündə iki günəş elektrik stansiyasının maliyyələşdirilməsi ilə bağlı yekun qərar veriləcək. Noyabrın 21-də isə 100 MVt gücündə günəş elektrik stansiyası üzrə ilk hərracın nəticələri elan ediləcək.
Bütün bunlar Azərbaycanın enerji sahəsindəki əzmkarlığını və yaşıl gələcək naminə qlobal həmrəyliyə sadiqliyini nümayiş etdirir. COP29 təşəbbüsləri, yalnız ölkəmizin deyil, bütün dünyanın dayanıqlı enerji gələcəyinə töhfə verməyə yönəlmiş əhəmiyyətli addımlardır. Bu yolda bizə qoşulan hər kəsə dərin təşəkkürümüzü bildiririk.
Rəylər (0):