Koreya Enerji Agentliyi: Mərkəzi Asiyada bərpa olunan enerji üçün istifadə edilməmiş potensial var
2030-cu ilə qədər dünyada bərpa olunan enerji potensialının 3 dəfə artırılması öhdəliyi enerji keçidində irəliyə doğru böyük addımdır.
Renewables.az-ın məlumatına görə, bunu Koreya Enerji Agentliyinin prezidenti Sanqhon Li COP29 çərçivəsində təşkil olunmuş "2030-cu ilə qədər bərpa olunan enerji üzrə qoyuluş gücünün üçqat artırılması: Mərkəzi Asiyada bərpa olunan enerjidən istifadənin sürətləndirilməsi üçün praktiki işlərin görülməsi" adlı Mərkəzi Asiya üzrə Regional Seminarda bildirib.
Onun sözlərinə görə, iqtisadiyyatı böyüyən, əhalisi artan Mərkəzi Asiya ölkələrinin inkişafı üçün daha çox enerjiyə ehtiyacı var: "Bununla belə, qalıq yanacaq hələ də Mərkəzi Asiyanın 5 ölkəsi - Qazaxıstan, Qırğızıstan, Tacikistan, Türkmənistan və Özbəkistanda ümumi enerji təchizatının 95 %-ni təşkil edir. Qalıq yanacaqlardan ağır asılılıq regionu tədarük çatışmazlığı və qiymət şoklarına qarşı həssas edir. Enerji təhlükəsizliyini artırmaq və Paris Sazişinə uyğun olaraq öhdəliklərə nail olmaq üçün bu ölkələr indiki qalıq yanacaqlardan asılılıqdan aşağı karbonlu və dayanıqlı enerji sisteminə keçid yollarını fəal şəkildə araşdırırlar".
Sanqhon Li hesab edir ki, bölgə bərpa olunan enerji üçün istifadə edilməmiş böyük potensiala malikdir: "Region böyük bərpa olunan enerji mənbəyidir. Xüsusilə Qazaxıstan və Tacikistan elektrik enerjisinin demək olar ki, 90 %-ni hidroenergetikadan əldə edə bilər, çünki onların hidro potensialının böyük hissəsi istifadə olunmamış qalır".
Rəylər (0):