"Masdar" Afrikada 5 QVt gücündə bərpa olunan enerji layihələri üçün müqavilələr imzalayıb

image

BƏƏ-nin enerji şirkəti "Masdar" Anqola, Uqanda və Zambiyada 5 QVt ümumi istehsal gücünə malik layihələr üçün müqavilələr imzalayıb.

"Renewables.az" şirkətin rəsmi saytında dərc olunmuş məlumata istinadən xəbər verir ki, imzalanmış sazişlər 2035-ci ilə qədər Afrika qitəsində 100 milyon insanı təmiz elektrik enerjisi ilə təmin edəcək.

Əbu-Dabi Davamlılıq Həftəsində (ADSW) imzalanmış müqavilələr Afrikanın bərpa olunan enerji sahəsinin inkişafına sərmayə qoymaq üçün dövlət və özəl sektor vəsaitlərini cəlb etmək məqsədi daşıyan "Etihad 7" təşəbbüsü çərçivəsində imzalanıb.

"Etihad 7" təşəbbüsü altında imzalanmış müqavilələr bunlardır:
• Ümumi gücü 2 QVt olan bərpa olunan enerji layihələrinin inkişafı üçün Anqolanın Energetika və Su Nazirliyi ilə müqavilə;
• Ümumi quraşdırılmış gücü 1 QVt olan bərpa olunan enerji layihələrinin inkişafı üçün Uqandanın Energetika və Mineral İnkişaf Nazirliyi ilə müqavilə.
• Ümumi gücü 2 QVt olan günəş, külək və su elektrik enerjisi layihələrinin birgə inkişafı üçün Zambiyanın Energetika Nazirliyi və Zambiyanın milli kommunal şirkəti "ZESCO Limited" ilə müqavilə.

"Masdar"ın baş icraçı direktoru Mohamed Jameel Al Ramahi deyib:  "2030-cu ilə qədər bütün dünyaya 100 QVt təmiz enerji çatdırmaq məqsədimiz var. Əbu-Dabi Davamlılıq Həftəsində imzaladığımız sazişlər bu ölkələrin təmiz enerji məqsədlərini dəstəkləyəcək və davamlı iqtisadi inkişafı təmin etməyə kömək edəcək”.

Xatırladaq ki, ötən ilin avqustunda "Masdar", Etihad 7 proqramı çərçivəsində ümumi gücü 2 QVt-a qədər olan bərpa olunan enerji layihələrini inkişaf etdirmək üçün Tanzaniyada yeganə elektrik enerjisi təminatçısı olan TANESCO ilə müqavilə imzalayıb. Hər iki tərəf bu strateji əməkdaşlığı inkişaf etdirmək üçün müştərək müəssisənin yaradılmasını yekunlaşdırmaq prosesindədir.

Beynəlxalq Bərpa Olunan Enerji Agentliyinin (IRENA) məlumatına görə, Böyük Səhranın cənubundan Afrika əhalisinin yarısından azının elektrik enerjisinə çıxışı var. Afrikada elektrik enerjisinin yalnız 20 faizi bərpa olunan mənbələrdən istehsal edilir. McKinsey & Company-nin analitik dəstəyi ilə "Masdar" və Əbu-Dabi Davamlılıq Həftəsinin keçən il hazırladığı hesabata görə, qitənin nəzəri potensialı təxminən 850 teravat günəş və külək enerjisi gücünə malikdir.


 

Rəylər (0):

Email adresin görünməyəcək. Məcburi sahələr doldurulmalıdır. *