Nazir müavini: "Yapon şirkətləri Qarabağ və Naxçıvanda müxtəlif enerji layihələri həyata keçirir"
Yapon şirkətləri təkcə Qarabağ bölgəsində deyil, hazırda Naxçıvan Muxtar Respublikasında da energetika sahəsində müxtəlif layihələr həyata keçirir.
Renewables.az “Report”a istinadən xəbər verir ki, bunu Azərbaycan xarici işlər nazirinin müavini Elnur Məmmədov Bakıda Yaponiyanın Milli Gününə həsr olunmuş rəsmi qəbulda deyib.
E.Məmmədov bildirib ki, bərpa olunan enerji sahəsində Yaponiyanın ölkəmizlə əməkdaşlığı daha da inkişaf etdirəcəyinə inanır.
Onun sözlərinə görə, hazırda Azərbaycan işğaldan azad edilmiş torpaqlarda yeni iqtisadi layihələr həyata keçirir, geniş yenidənqurma işləri aparır:
"Qarabağ və Şərqi Zəngəzur iqtisadi rayonunda yaranmış nəqliyyat qovşağı sülh və regionlararası ticarət üçün yeni imkanlar açır. Hazırda Ağdamda yaradılmış Sənaye Parkına, Cəbrayıldakı Araz Vadisi İqtisadi Zonasına maraq artmaqdadır. Ölkəmizin iqtisadi inkişaf kursunda işğaldan azad edilmiş ərazilərdə "ağıllı şəhər" və "ağıllı kənd" konsepsiyalarının həyata keçirilməsi, "yaşıl enerji" zonalarının yaradılması əsas istiqamətlərdən biridir".
Nazir müavini bildirib ki, Qubadlı, Zəngilan, Cəbrayıl və Füzuli rayonlarında günəş enerjisi, Laçın və Kəlbəcərdə külək enerjisi layihələri üçün əlverişli potensial mövcuddur.
Rəylər (0):