Almaniyanın bərpa olunan enerji üzrə ixtisaslaşmış "SINN Power" şirkəti dünyanın ilk şaquli üzən günəş elektrik stansiyasını istifadəyə verib.
Stansiya Bavariyanın Ştarnberq bölgəsində, Jais çınqıl karxanasında yerləşir. Onun qoyuluş gücü 1,87 MVt təşkil edir və ildə təxminən 2 milyon kVts elektrik enerjisi istehsal etməsi gözlənilir.
Bu, yüzlərlə ev təsərrüfatını enerji ilə təmin etmək üçün kifayətdir, halbuki stansiya gölün cəmi 4,65 faiz səthini tutur. Layihənin rəhbəri Qotfrid Yais bildirib ki, bu sistem sayəsində müəssisənin elektrik şəbəkəsindən istifadə səviyyəsi ilkin mərhələdə 60 faiz azalıb, tam optimallaşdırıldıqda isə bu göstərici 70 faizə çata bilər.
Şirkətin patentləşdirilmiş Skipp-Float texnologiyası panelləri şaquli şərq-qərb istiqamətində yerləşdirir. Panellər arasında ən azı 4 metr enində su keçidi saxlanılır ki, bu da hava dövranını və işıq əksini təmin edir. Bu dizayn gün ərzində daha taraz enerji istehsalı yaradır və xüsusilə səhər və axşam saatlarında enerji çıxışını artırır.
Panellər 1,6 metr dərinlikdə su səthinə lövbərlənmiş kielvari quruluş üzərində yerləşir və bu, onların külək və su səviyyəsinin dəyişmələrinə uyğun hərəkət etməsinə imkan verir. Stansiya üzən kabel vasitəsilə enerji şəbəkəsinə qoşulub və sahildəki enerji ötürmə nöqtəsinə birləşdirilib.
Layihə Almaniyanın Federal Su Resursları Qanununun (WHG) tələblərinə cavab verir və su səthinin cəmi 15 faizindən az hissəsini tutur. Hazırda ikinci mərhələnin (1,7 MW) inşası davam edir və ümumi səth örtüyü 10 faizdən çox olmayacaq.
İlkin ekoloji müşahidələr stansiyanın ətraf mühitə mənfi təsiri olmadığını, əksinə, su keyfiyyətini yaxşılaşdırdığını və balıqlar, eləcə də su quşları üçün yeni yaşayış yerləri yaratdığını göstərib.
Stansiyanın açılış mərasimində Bavariya Baş naziri Markus Söder, Bayernwerk şirkətinin baş direktoru Eqon Vestfal, Ştarnberq rayon rəhbəri Stefan Frey və SINN Power-in təsisçisi və baş direktoru Dr. Filip Sinn iştirak ediblər.
