Çinin Sincan Uyğur Muxtar Rayonunda 360 metr hündürlüyündə külək ölçmə qülləsi tam istifadəyə verilib.
Renewables.az China Daily nəşrinə istinadla xəbər verir ki, Eyfel qülləsindən də hündür olan bu qurğu külək enerjisi sənayesində dünyada ən hündür ölçmə qülləsi hesab olunur.
Qurğu Muley Qazax Muxtar Dairəsində yerləşən 800 MVt gücündə eksperimental külək elektrik stansiyasının əsas hissəsidir. Burada müxtəlif yüksəkliklərdə küləyin sürəti, istiqaməti, külək dəyişkənliyi və turbulentlik səviyyəsi ölçüləcək.
Toplanan məlumatlar yüksək hündürlüklərdə külək enerjisinin öyrənilməsinə, daha böyük və güclü külək turbinlərinin layihələndirilməsinə və yeni enerji sistemlərinin qurulmasına kömək edəcək. Çünki yüksəklik artdıqca küləklər daha güclü və sabit olur və bunu adi yerüstü meteoroloji stansiyalarla dəqiq ölçmək mümkün deyil.
17 sentyabrda tamamlanan qüllə lidar sensorları və turbinlərin yaratdığı külək axınının təsirini izləyən sistemlərlə birlikdə geniş müşahidə şəbəkəsi yaradacaq. Bu obyektin Çinin külək enerjisi üzrə standartlarının hazırlanması və yenilənməsi üçün də mühüm sınaq bazasına çevrilməsi gözlənilir.
Həmin gün külək enerjisi mərkəzi 11 külək ölçmə avadanlığı istehsalçısı və 6 universitetlə əməkdaşlıq sazişləri imzalayıb.
Muley bölgəsi güclü küləkləri və günəş enerjisi potensialı ilə Çinin mühüm bərpa olunan enerji mərkəzlərindən birinə çevrilir. Bölgədə orta illik külək sürəti 8,2 m/s, effektiv günəş işığı isə 1 700 saatdan çoxdur. Burada artıq 60-dan çox yeni enerji şirkəti fəaliyyət göstərir.
2025-ci ilin sonuna Muleyin elektrik şəbəkəsinə qoşulmuş enerji gücü 20 GVt-ı ötüb. Bölgədə külək turbinləri, günəş panelləri və enerji saxlama sistemlərini əhatə edən tam enerji avadanlığı təchizat zənciri də formalaşıb.
Ümumilikdə Sincanda bərpa olunan enerjiyə keçid sürətlənir. 2026-cı ilin ilk yarısında regionda şəbəkəyə qoşulmuş yeni enerji mənbələrindən 89,3 milyard kVts elektrik istehsal edilib ki, bu da ümumi elektrik istehsalının 30 faizindən çoxunu təşkil edib. İyunun sonuna regionun ümumi elektrik enerjisi gücü 267 GVt-ı keçib, bunun 65 faizi bərpa olunan enerjinin payına düşüb.
