Birləşmiş Ərəb Əmirlikləri (BƏƏ) dünyanın ilk və ən böyük birləşdirilmiş günəş enerjisi və batareya saxlanma layihəsinin təməlini qoyub. Layihə sutkanın 24 saatı ərzində fasiləsiz olaraq bərpa olunan enerji istehsal edə biləcək.
“Masdar” şirkəti tərəfindən BƏƏ Su və Elektrik Şirkəti (EWEC) ilə əməkdaşlıq çərçivəsində həyata keçirilən 6 milyard ABŞ dolları dəyərindəki layihə, gündə 24 saat, həftənin yeddi günü 1 giqavata (GW) qədər baza yüklü elektrik enerjisi təmin edəcək.
“Masdar”ın məlumatına görə, təməlqoyma mərasimində Prezident Administrasiyasının İnkişaf və Şəhid Ailələri məsələləri üzrə sədr müavini Şeyx Zeyyab bin Məhəmməd bin Zayed Əl Nəhyən iştirak edib.
Layihə 5,2 giqavat gücündə günəş fotoelektrik (PV) stansiyasını və 19 giqavat-saatlıq batareya enerjisi saxlama sistemini (BESS) birləşdirəcək. Kompleks süni intellektlə gücləndirilmiş proqnozlaşdırma və ağıllı idarəetmə, həmçinin sistemin optimallaşdırılması üçün AI-uyğun infrastruktur ilə təchiz olunacaq. Stansiya 500 min ev təsərrüfatını elektrik enerjisi ilə təchiz edəcək.
Obyektin 2027-ci ildə istismara verilməsi planlaşdırılır. Məlumata görə, stansiya “qlobal miqyasda rəqabətqabiliyyətli tarif”lə enerji təchiz edəcək.
Layihənin 10 mindən çox yeni iş yeri yaradacağı, istehsal və xidmət müəssisələrinin qurulmasına təkan verəcəyi və ildə təxminən 5,7 milyon ton karbon emissiyasının qarşısını alacağı bildirilir.
Qeyd edək ki, 2025-ci ilin yanvarında “Masdar” layihə üzrə əsas mühəndislik, təchizat və tikinti (EPC) podratçılarını, eləcə də günəş panelləri və batareya sistemlərinin təchizatçılarını müəyyənləşdirmişdi. Stansiya "Jinko Solar" və "JA Solar"ın panelləri və "CATL" şirkətinin BESS ilə təchiz olunacaq.
