Avropada külək enerjisinin qoyuluş gücü 19 QVt artıb - WindEurope
Avropada 2022-ci ildə Avropada külək enerjisinin qoyuluş gücü 19 QVt artıb. Bunun 16 QVt-ı Avropa İttifaqı (Aİ) ölkələrində olub.
"Renewables.az" xəbər verir ki, bu barədə WindEurope-nin yeni hesabatında bildirilir.
Hesabatda bildirilir ki, Aİ ölkələrindəki artım 2021-ci ilə nisbətən 40 % çoxdur. Lakin bu, Aİ-nin 2030-cu il hədəfləri üçün lazım olandan çox azdır.
Külək enerjisinin qoyuluş gücündə ən çox artım İsveç, Finlandiya, Almaniya və Fransada olub.
2022-ci ildə yeni külək stansiyalarına investisiyalar və yeni külək turbinləri sifarişləri hökumətlərin elektrik enerjisi bazarlarına və inflyasiyaya müdaxilələri səbəbindən azalıb: Aİ və hökumətlər investorların inamını bərpa etməlidir.
Avropa hazırda 255 QVt külək enerjisi gücünə malikdir. Ötən il Avropada tikilən külək elektrik stansiyaların 87 %-i quruda olub (16,7 QVt). Yalnız 2,5 QVt gücündə dənizdə külək stansiyaları tikilib ki, bu da artımın 13 %-i deməkdir.
Aİ-nin 27 ölkəsi 16 QVt gücündə külək stansiyaları inşa edib. 2023-2027-ci illərdə Aİ-nin hər il orta hesabla 20 QVt yeni külək stansiyalarının tikəcəyi gözlənilir. Lakin bu, Aİ-nin enerji və iqlim hədəflərinə çatmaq üçün kifayət deyil. Aİ 2030-cu ilə qədər hər il orta hesabla 31 QVt gücündə stansiyalar qurmalıdır.
2022-ci ildə Avropada külək enerjisi istehsalı 489 milyard kVt-saat (489 teravat-saat) təşkil edib.
Rəylər (0):