Böyükşor gölü üzərində pilot günəş enerjisi qurğusu istismara verilib
Böyükşor gölü üzərində pilot günəş enerjisi qurğusu istismara verilib.
Renewables.az xəbər verir ki, bu gün ümumi gücü 100 kVt (95 kVt suda, 5 kVt quruda) olan günəş enerjisi qurğusunun açılış mərasimi keçirilib.
Açılış mərasimində Energetika Nazirliyi yanında Bərpa Olunan Enerji Mənbələri Dövlət Agentliyinin (BOEMDA) direktoru Cavid Abdullayev və Asiya İnkişaf Bankının (ADB) Azərbaycandakı Daimi Nümayəndəliyinin rəhbəri xanım Kendis Makdeyqan çıxış edib.
Tədbirdə çıxış edən BOEMDA-nın direktoru Cavid Abdullayev karbon emissiyalarının azaldılması və iqlim dəyişikliyinə qarşı mübarizədə qlobal səylərə ölkəmizin töhfələrindən danışıb. Azərbaycan Respublikasının Prezidenti cənab İlham ƏIiyevin bərpa olunan enerjidən istifadənin inkişafını prioritetləşdirən dövlət siyasətinə müvafiq olaraq reallaşdırılan meqa layihələrə diqqət çəkilib, Qaradağ Günəş Elektrik Stansiyasının istismara verilməsi ilə cari ilin altı ayında günəş enerjisi istehsalında 8 dəfədən çox artım qeydə alındığını bildirib. Çıxışda su hövzəsi üzərində istismara verilən ilk günəş elektrik qurğusu haqqında: “95 kilovatı suda, 5 kilovatı quruda quraşdırılan layihə vasitəsilə illik 160 000 kilovat-saatdan çox elektrik enerjisi istehsalı proqnozlaşdırılır. Layihə, özəl investisiyaların cəlb olunması üçün çağırış rolunu oynayır və genişləndirilməsi ilə bağlı müzakirələrə artıq start verilib” deyə qeyd olunub.
Daha sonra çıxış edən ADB-nin Azərbaycandakı Daimi Nümayəndəliyinin rəhbəri xanım Kendis Makdeyqan deyib: “ADBb regional layihə çərçivəsində Azərbaycanda su üzərində günəş enerjisindən istifadənin inkişafı üçün texniki dəstək verir. COP29 tədbiri ərəfəsində bu innovativ qurğunun işə salınmasının əhəmiyyəti böyükdür. Pilot layihə kiçik miqyasda həyata keçirilsə də, Azərbaycanda daha bir yaşıl enerji mənbəyinə çevrilir, su və günəş resurslarından birgə istifadəni optimallaşdırır, enerji kompleksini şaxələndirir və emissiyaların qarşısını alır”.
Daha sonra rəsmilər simvolik lenti kəsiblər.
Sistem vasitəsilə illik 160 000 kilovat-saatdan çox elektrik enerjisi istehsalı proqnozlaşdırılır.
Qeyd edək ki, layihə Energetika Nazirliyi və Asiya İnkişaf Bankı tərəfindən həyata keçirilən “Üzən günəş panelləri sisteminin inkişafına dair bilik mübadiləsi və texniki yardım” layihəsi çərçivəsində həyata keçirilib. Layihə çərçivəsində stansiyanın istismarı və texniki xidməti sahəsində təlimlərin təşkili də nəzərdə tutulur.
Rəylər (0):