GWEC: 2022-ci ildə 8,8 QVt gücündə dənizdə külək elektrik stansiyaları şəbəkəyə qoşulub
2022-ci ildə dünyada dənizdə külək enerjisinin gücü 64,3 QVt-a çatıb.
Renewables.az xəbər verir ki, bu barədə Qlobal Külək Enerjisi Birliyinin (GWEC) "Dənizdə Külək Enerjisi 2023" hesabatında bildirilir.
Hesabata görə, bu güc ümumi külək enerjisi gücünün 7,1 %-ni təşkil edib.
Hesabatda bildirilir ki, 2022-ci ildə 8,8 QVt gücündə dənizdə külək elektrik stansiyaları şəbəkəyə qoşulub ki, bu da 16 % artım deməkdir. Növbəti on ildə (2023-2032) 380 QVt-dan çox dənizdə külək enerjisi gücünün istifadəyə veriləcəyi, bununla da 2032-ci ildə dənizdə külək enerjisi gücünün 447 QVt-a çatacağı proqnozlaşdırılır.
Dənizdə quraşdırılan yeni (2022-ci ildə) külək enerjisi güclərinin ölkələr üzrə payı aşağıdakı kimi olub:
-
Çin: 57,6 %;
-
Birləşmiş Krallıq: 13,4 %;
-
Tayvan: 13,4 %;
-
Fransa: 5,5 %;
-
Niderland: 4,2 %;
-
Almaniya: 3,9 %;
-
Norveç: 2 %.
Beləliklə, 2022-ci ildə dənizdə külək enerjisi güclərinin 72 %-i Asiya-Sakit okean regionunda, 28 %-i isə Avropada quraşdırılıb.
Ümumi dənizdə külək enerjisi gücünə görə ölkələrin pay siyahısı belədir:
-
Çin: 48,9 %;
-
Birləşmiş Krallıq: 21,6 %;
-
Almaniya: 12,5 %;
-
Niderland: 4,4 %;
-
Danimarka: 3,6 %;
-
Digər ölkələr: 9 %.
Ümumi dənizdə külək enerjisi gücünün 52,9 %-i Asiya-Sakit okean regionunda, 47,1 %-i Avropada, 0,1 %-i isə Şimali Amerikada quraşdırılıb.
Xatırladaq ki, Azərbaycanın dənizdə külək enerjisi potensialı 157 QVt-dır. Dənizdə külək enerjisi layihələrinin icrası məqsədilə xarici investorlarla müqavilələr imzalanıb.
Rəylər (0):