Türkiyə günəş enerjisinə 4 milyard dollar investisiya cəlb edə bilər
Böyük Britaniyanın təmiz enerji şirkəti "Hive Energy", təxminən 4 giqavatlıq günəş enerjisi layihəsi üçün Türkiyəyə 4 milyard dollar birbaşa investisiya cəlb etməyi planlaşdırır.
"Renewables.az"ın Anadolu Agentliyinə istinadən verdiyi xəbərə görə, layihələrin gücləri 11 ilə 230 meqavat arasında olacaq.
Böyük Britaniyada günəş enerjisi layihələrinə diqqət yetirən və 20-dən çox ölkədə bərpa olunan enerji layihələrini inkişaf etdirən "Hive Energy" Türkiyədə yerləşən "Çuhadar Enerji" və "Viva Enerji" şirkətləri ilə əməkdaşlıq və maliyyələşdirmə müqavilələri çərçivəsində saxlama anbarı olan 30-dan çox günəş elektrik stansiyası üçün Enerji Bazarını Tənzimləmə Qurumuna müraciət edib.
Şirkət, təxminən 4 giqavatlıq saxlama anbarlı günəş enerjisi layihələrinin reallaşması nəticəsində Türkiyəyə 4 milyard dollardan çox birbaşa investisiya axını təmin etməyi hədəfləyir.
Şirkət və layihə tərəfdaşları arasında imzalanan tərəfdaşlıq və maliyyələşdirmə müqaviləsi çərçivəsində layihələrin həyata keçirilməsi üçün Türkiyəyə birbaşa beynəlxalq investisiyaların gətirilməsi planlaşdırılır. İlkin lisenziyaya uyğun gələn layihələrin ilin birinci rübündə dəqiqləşdirilməsi və bu proses başa çatdıqdan sonra beynəlxalq maliyyə qurumları ilə layihələrin maliyyələşdirilməsi danışıqlarının aparılacağı gözlənilir.
Rəylər (0):