Masdar "yaşıl" istiqrazların debüt satışını həyata keçirib
Birləşmiş Ərəb Əmirliklərinin (BƏƏ) “Masdar” (“Abu Dhabi Future Energy Company”) şirkəti London Fond Birjasında (LSE) 750 milyon ABŞ dolları dəyərində 10 illik "yaşıl" istiqrazlarının debüt satışını həyata keçirib.
Renewables.az Masdar-ın yaydığı məlumata əsasən xəbər verir ki, mərasimdə BƏƏ-nin sənaye və qabaqcıl Texnologiyalar Naziri, COP28-in prezident və Masdar-ın sədri, Sultan bin Əhməd Əl Cabir və digər dövlət rəsmiləri iştirak edib.
Qeyd edək ki, ötən ay Masdar 750 milyon ABŞ dolları dəyərində 10 illik "yaşıl" istiqrazlarının debüt buraxılışını həyata keçirib. Yaşıl Maliyyə Çərçivəsinə uyğun olaraq, bu istiqrazdan əldə edilən xalis gəlir və gələcək təkliflər yalnız bir çox inkişaf etməkdə olan iqtisadiyyatlara və investisiyaya, iqlimə həssas ölkələrdə olacaq “tünd yaşıl” bərpa olunan enerji layihələrinə investisiya etmək üçün istifadə olunacaq.
Şirkət bu həftə "yaşıl" istiqrazlardan əldə etdiyi gəlirlə Azərbaycanda "Qaradağ" Günəş Elektrik Stansiyası və Özbəkistanda qoyuluş gücü 500 MVt olan dəniz külək enerjisi layihələrin hər birinə cəlb edilən 250 milyon ABŞ dollarlıq keçid kreditlərini bağlayacaq. Qalan 250 milyon ABŞ dolları isə Özbəkistandakı üç günəş enerjisi layihəsinə yönəldiləcək və bu layihələrin maliyyələşdirilməsi tezliklə yekunlaşdırılacaq.
Bundan əlavə, Masdar 2030-cu ilə qədər qlobal portfelini 100 QVt-a çatdırmaq məqsədilə yerli və xarici yeni bərpa olunan enerji layihələri üzrə kapital maliyyələşdirmə öhdəliklərini yerinə yetirmək üçün 3 milyard ABŞ dollarına qədər "yaşıl" istiqrazlar buraxacaq.
Şirkət Azərbaycanda quruda külək və günəş layihələri, dənizdə külək və yaşıl hidrogenin inteqrasiyası layihələri üzrə ümumi gücü 4 QVt olan müqavilələr imzalayıb. Qeyd edək ki, mayın 16-da “Qaradağ” GES-də energetika naziri Pərviz Şahbazov və “Masdar” şirkətinin baş icraçı direktoru Mohamed Jameel Al Ramahinin iştirakı ilə ilk günəş paneli quraşdırılıb.
2006-cı ildə qurulan Masdar BƏƏ-nin təmiz enerji mərkəzidir. O, 40-dan çox ölkədə fəaliyyət göstərir və ümumi gücü 20 QVt-dan çox olan bərpa olunan enerji layihələri portfelinə sərmayə qoyub. Masdar 2030-cu ilə qədər ən azı 100 QVt ümumi bərpa olunan enerji gücünə nail olmaq öhdəliyi götürüb.
Rəylər (0):