ABŞ təmiz enerji təşəbbüslərinə 20 milyard dollar ayırır
Ağ Ev ABŞ-də təmiz enerji təşəbbüslərinin inkişafı üçün 20 milyard dollar ayırır.
Renewables.az AZƏRTAC-a istinadla xəbər verir ki, bu barədə ABŞ-nin vitse-prezidenti Kamala Harris bildirib.
O qeyd edib ki, ölkə tarixində yerli iqlim layihələrinin maliyyələşdirilməsinə ən böyük sərmayə qoyulur. “İtirdiyimiz vaxtı kompensasiya etməliyik. Biz bilirik ki, işimizi əhəmiyyətli dərəcədə sürətləndirməklə, emissiyaları azalda biləcəyik. Biz bunu təmiz enerji layihələrinə 20 milyard dollar ayırmaqla edəcəyik”, - deyə K.Harris vurğulayıb.
Harris xatırladıb ki, ABŞ Prezidenti Cozef Baydenlə birlikdə 2030-cu ilə qədər istixana qazlarını yarıyadək azaltmaq və 2050-ci ilədək sıfıra çatdırmaq üçün qarşıya “iddialı məqsəd” qoyublar.
Onun sözlərinə görə, tikinti şirkətləri bu sərmayədən istifadə edərək inşa olunacaq binalarda enerjiyə qənaət edən qurğuların quraşdırılması imkanlarına malik ola bilərlər. Bu da enerji istehlakını və sakinlərin enerji xərclərini azaltmağa kömək edəcək. Bundan əlavə, kiçik biznes sahibləri də elektriklə işləyən yük maşınları almaq üçün sıfır faizli kreditlər ala bilərlər. Harris əlavə edib ki, vəsaitin ayrılması dövlət və özəl müəssisələr arasında fəal əməkdaşlığı nəzərdə tutur və yeni iş yerlərinin açılmasına imkan verəcək.
Rəylər (0):