ACWA Power: Azərbaycana 5 milyard dollara yaxın investisiya yatırılacaq
“ACWA Power” Azərbaycana 5 milyard dollara yaxın investisiya yatıracaq.
Renewables.az yerli mediaya istinadən xəbər verir ki, bu sözləri “ACWA Power” şirkətinin EVP - regional direktoru Abid Malik Bakı Enerji Forumunda “Davamlı Enerji: Xəzər regionunda Yaşıl Enerji Potensialı” mövzusunda keçirilən panel müzakirəsində çıxışı zamanı deyib.
O bildirib ki, investisiya əsasən bərpaolunan enerji sahəsinə yatırılacaq.
“ACWA Power” olaraq Azərbaycanda bir müddətdir ki, fəaliyyət göstəririk. Bərpaolunan enerji ilə bağlı burada perspektiv çoxdur. Belə ki, siyasi baxımdan stabil region olmaqla yanaşı, tranzit yollar və dəhliz üstünlüklərini nəzərə alsaq Azərbaycan çox əlverişlidir və bizim üçün hədəf ölkədir. Eyni zamanda, biz SOCAR-la da əməkdaşlıq edirik. Bizim planlarımızdan biri Azərbaycan ilə əməkdaşlıq edərək yaşıl enerjini inkişaf etdirməkdir. Burada tamamlanacaq mərhələlər çoxdur”, - deyə o diqqətə çatdırıb.
O vurğulayıb ki, şirkət hazırda Azərbaycan hökuməti ilə dənizdə gücü 100 MVt-dan çox olan elektrik stansiyasının inşası layihəsi üzərində işləyir: “Ölkədəki yüksək sabitliyi və onun coğrafi mövqeyini nəzərə alsaq, Azərbaycanın bizim üçün çox önəmli olduğunu söyləyə bilərik. Biz bir müddətdir ki, bu ölkədə işləyirik”.
Regional direktorun sözlərinə görə, “yaşıl hidrogen” sahəsində əməkdaşlıq çox vacibdir.
Rəylər (0):