Azərbaycanda bərpaolunan enerji ilə bağlı bəzi səlahiyyətlər prezidentə aid olacaq
Azərbaycanda bərpaolunan enerji mənbələrinin ərazisində elektrik enerjisi istehsalçısının birbaşa cəlbetmə yolu ilə seçilməsi ölkə prezidentinin razılığı ilə olacaq.
"Berpaolunanenerji.az" xəbər verir ki, bu barədə Prezident İlham Əliyevin bu gün təsdiqlədiyi “Elektrik enerjisi istehsalında bərpaolunan enerji mənbələrindən istifadə haqqında” qanunda bildirilir.
Sənəsə əsasən, birbaşa cəlbetmə iki halda baş verəcək: Birincisi dövlətin maraqları və strateji əhəmiyyət baxımından zəruri olan pilot və digər layihələr həyata keçirildikdə və bərpaolunan enerji mənbələrinin ərazisində elektrik enerjisi istehsalçısının seçilməsi üçün keçirilən hərrac baş tutmadıqda.
Həmçinin bərpaolunan enerji mənbələrinin ərazisində elektrik enerjisi istehsalçısının seçilməsi qaydasını, habelə bağlanılan müqavilələrin xüsusiyyətlərini və şərtlərini də dövlət başçısı müəyyən edəcək.
Bundan əlavə bərpaolunan enerji ilə bağlı fəaliyyət planını da prezident təsdiqləyəcək.
Fəaliyyət planına bərpaolunan enerji mənbələrinin təbiətdə mövcud potensialı, müasir texnologiyaları, elektrik şəbəkəsinin inkişafı, elektrik enerjisinin istehlakı proqnozları və elektrik enerjisi istehlakçılarının maarifləndirilməsi istiqamətində aparılmış tədqiqatlara əsaslanan ümumdövlət, yerli və digər tədbirləri, elektrik enerjisi istehsalında bərpa olunan enerji mənbələrindən istifadəyə dair hədəflər daxildir.
Rəylər (0):