Son 15 ildə günəş paneli istehsalı 38 dəfə artaraq 271 QVt-a çatıb
Qlobal günəş fotovoltaik (PV) paneli istehsalı son 15 ildə 38 dəfə artıb.
Renewables.az-ın məlumatına görə, bu barədə Beynəlxalq Bərpa Olunan Enerji Agentliyi (IRENA) öz hesabatında "Wood Mackenzie" şirkətinə istinadən bildirib.
2007-2022-ci illərdə günəş paneli istehsalı 7,2 QVt-dan təqribən 38 dəfə artaraq 2022-ci ildə 271 QVt təşkil edib. Təkcə Çinin qlobal istehsal bazarındakı payı 2 dəfə artaraq 2008-ci ildəki 39 %-dən 2022-ci ildə 78 %-ə çatıb.
Dünyanın digər bölgələrində yalnız minimal istehsal həyata keçirilir. 2008-2022-ci illərdə Avropanın payı 30 %-dən 0,5 %-ə, Yaponiyanın payı 11 %-dən 0,2 %-ə, ABŞ-nin payı 6,8 %-dən 1,7%-ə düşüb.
Çinin günəş paneli ixracının dəyəri (əsas alıcı Avropa olmaqla) 2022-ci ildə 64 % artaraq 32 milyard ABŞ dollarından 52 milyard ABŞ dollarına yüksəlib. Bu, ölkənin dominant mövqeyini və modullarının ABŞ və ya Avropada istehsal olunanlardan 57 %-ə qədər daha sərfəli olduğunu əks etdirir. Çinin əsas xərc üstünlüyü onun aşağı material xərcləridir.
Qeyd edək ki, Çinin günəş panelləri ixracı bu ilin ilk yarımilində 26,3 milyard dollar təşkil edib.
Rəylər (0):